ഗൾഫ് പ്രവാസികളുടെ തൊഴിൽ മേഖലകളിൽ ആകുലതയുടെ കാർമേഘങ്ങൾ പടർന്നു തുടങ്ങിയ കാലത്താണ് , നാട്ടിൽ തിരിച്ചുപോകേണ്ടി വന്നാൽ അവിടെ എന്തു ചെയ്യുമെന്ന ചോദ്യം ഉയർന്നത്.  ഈ ഒരു ചരിത്ര പശ്ചാത്തലത്തിലാണ് നാലായിരത്തിൽപരം വരുന്ന തിക്കോടിക്കാരായ പ്രവാസികളുടെ അതിജീവനത്തിന്റെ ഉത്തരവാദിത്വമേറ്റെടുക്കുന്ന ഒരു സംഘടന എന്ന നിലയിൽ  “ഗ്ലോബൽ തിക്കോടിയൻസ് ഫോറം “ (ജി.ടി.എഫ്.) എന്ന സംഘടന രൂപം കൊണ്ടത്.

ഒരു പ്രദേശത്തെ പ്രവാസികൾ അവർ ജനിച്ചുവളർന്ന നാടിന്റെ സമഗ്രമായ പുരോഗതിക്കും സാമൂഹിക സഹവർത്തിത്വത്തിനും സാഹോദര്യം ഊട്ടിയുറപ്പിക്കാനും കക്ഷിരാഷ്ട്രീയം, മതം, ജാതി തുടങ്ങിയ ചിന്തകൾക്കെല്ലാം അതീതമായി ഒപ്പം അംഗങ്ങൾക്കും അവരുടെ കുടുംബങ്ങൾക്കും സഹായകരമാവുന്ന ഒരു സംഘം എന്ന നിലക്കാണു ഈ സംഘടന പിറവിയെടുത്തത്. കുവൈത്ത്, യു.എ.ഇ., ഖത്തർ, ബഹ്‌റൈൻ, സൗദി അറേബ്യ, ഒമാൻ എന്നീ ആറു ജിസിസി രാജ്യങ്ങളിലും കൂടാതെ തിക്കോടിയിലും (ചാപ്റ്ററുകൾ) ആയി പരന്നു കിടക്കുന്ന ഒരു കൂട്ടായ്മയാണു നമ്മുടേത്. 

പ്രവാസികളുടെ പ്രയാസങ്ങൾക്ക് അറുതി വരുത്തുവാൻ നാം തന്നെ മുൻ‌കൈ എടുക്കണമെന്ന ബോധ്യത്തിൽ നിന്നാണു ഈ സംഘടനയുടെ ആവിർഭാവം. ചിതറിക്കിടക്കുന്ന നമ്മുടെ പ്രദേശ വാസികളെ സംഘടനയുടെ സ്നേഹച്ചരടിൽ കൂട്ടിച്ചേർക്കുകയും അവരുടെ സന്തോഷ സന്താപങ്ങളിൽ കൂടെ നിന്ന് പ്രവാസ വിരാമത്തിൽ കൈത്താങ്ങാവുന്ന രീതിയിൽ സാമ്പത്തിക സ്രോതസ്സ് നടപ്പിൽ വരുത്തുകയുമാണു പ്രാഥമിക കർമ്മ പരിപാടി.